ఆంధ్రభారతి - శతకములు - నరసింహ శతకము

సీ.	ప్రహ్లాదుఁ డేపాటి పైఁడి కానుక లిచ్చె? - మదగజం బెన్నిచ్చె మౌక్తికములు? నారదుం డెన్నిచ్చె నగలు రత్నంబు? ల - హల్య నీకే యగ్రహారమిచ్చె? ఉడుత నీ కేపాటి యూడిగంబులు చేసె? - ఘనవిభీషణుఁ డేమి కట్నమిచ్చె? పంచపాండవు లేమి లంచ మిచ్చిరి నీకు? - ద్రౌపతి నీ కెంత ద్రవ్యమిచ్చె?
తే.	నీకు వీరంద ఱయినట్లు నేను గాన? - యెందుకని నన్ను రక్షింప విందువదన? భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	71
సీ.	వాంఛతో బలిచక్రవర్తి దగ్గర జేరి - భిక్షమెత్తితి వేల, బిడియపడక? యడవిలో శబరి దియ్యని ఫలా లందియ్యఁ - జేతులొగ్గితి వేల, సిగ్గుపడక? వేడ్కతో వేవేగ విదురునింటికి నేఁగి - విందుఁగొంటి వదేమి, వెలితిపడక? నటుకు లల్పము కుచేలుఁడు గడించుక తేర - బొక్కసాగితి వేల, లెక్కగొనక?
తే.	భక్తులకు నీవు పెట్టుట భాగ్యమౌను - వారి కాశించితివి తిండివాఁడ వగుచు భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	72
సీ.	స్తంభమం దుదయించి దానవేంద్రునిఁ ద్రుంచి - కరుణతోఁ బ్రహ్లాదుఁ గాచినావు మకరిచేఁ జిక్కి సామజము దుఃఖించంగఁ - గృపయుంచి వేగ రక్షించినావు శరణంచు నా విభీషణుఁడు నీ చాటున - వచ్చినప్పుడె లంక నిచ్చినావు ఆ కుచేలుఁడు చేరెఁడటుకు లర్పించిన - బహుసంపదల నిచ్చి పంపినావు
తే.	వారివలె నన్నుఁ బోషింప వశముగాదె? - యింత వలపక్ష మేల శ్రీకాంత! నీకు? భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	73
సీ.	వ్యాసుఁడే కులమందు వాసిగా జన్మించె? - విదురుఁడే కులమందు వృద్ధిఁ బొందెఁ? గర్ణుఁడే కులమందు ఘనముగా వర్ధిల్లె? - నా వసిష్ఠుం డెందు నవతరించె? నింపుగా వాల్మీకి యే కులంబునఁ బుట్టె? - గుహుఁ డను పుణ్యుఁడే కులమువాఁడు? శ్రీశుకుఁ డెచ్చటఁ జెలఁగి జన్మించెను? - శబరి యే కులమందు జన్మమొందె?
తే.	నే కులంబున వీరంద ఱెచ్చినారు? - నీ కృపాపాత్రులకు జాతినీతు లేల? భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	74
సీ.	వసుధాస్థలంబున వర్ణహీనుఁడు గాని - బహుళ దురాచారపరుఁడు గాని తడసి కాసియ్యని ధర్మశూన్యుఁడు గాని - చదువనేరని మూఢజనుఁడు గాని సకలమానవులు మెచ్చని కృతఘ్నుఁడు గాని - చూడ సొంపును లేని శుంఠ గాని అప్రతిష్ఠలకు లోనైన దీనుఁడు గాని - మొదటికే మెఱుఁగని మోటుగాని
తే.	ప్రతిదినము నీదు భజనచేఁ బరఁగునట్టి - వానికే వంక లేదయ్య వచ్చు ముక్తి భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	75
సీ.	ఇభకుంభములమీఁది కెగిరెడి సింగంబు - ముట్టునే కుఱచైన మూషికమును? నవచూతపత్రముల్‌ నమలుచున్న పికంబు - గొఱుకునే జిల్లేడుకొనలు నోట? అరవిందమకరంద మనుభవించెడి తేఁటి - పోవునే పల్లేరుపూల కడకు? లలితమైన రసాలఫలముఁ గోరెడి చిల్క - మెసవునే భ్రమత నుమ్మెత్తకాయ?
తే.	నిలను నీకీర్తనలు పాడనేర్చినతఁడు - పరులకీర్తనఁ బాడునే యరసి చూడ? భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	76
సీ.	సర్వేశ! నీపాదసరసిజ ద్వయమందుఁ - జిత్త ముంపఁగలేను జెదరకుండ నీవైన దయయుంచి నిలిచి యుండెడునట్లు - చేరి నన్నిపుడేలు సేవకుఁడను వనజలోచన! నేనువట్టి మూర్ఖుఁడఁ జుమ్మి - నీ స్వరూపముఁ జూడ నేర్పు వేగ తన కుమారుల కుగ్గు తల్లి వోసినయట్లు - భక్తిమార్గంబను పాలు పోసి
తే.	ప్రేమతో నన్నుఁ బోషించి పెంచుకొనుము - ఘనత కెక్కించు నీ దాసగుణములోన భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	77
సీ.	జీమూతవర్ణ! నీ మోముతో సరిరాక - కమలారి యతికళంకమునుఁ బడసె సొగసైన నీ నేత్రయుగముతో సరిరాక - నళినబృందము నీళ్లనడుమఁ జేరెఁ గరిరాజవరద! నీగళముతో సరిరాక - పెద్దశంఖము బొబ్బపెట్టఁ దొడఁగె శ్రీపతి! నీ దివ్యరూపుతో సరి రాక - పుష్పబాణుఁడు నీకుఁ బుత్రుఁ డయ్యె
తే.	నిందిరాదేవి నిన్ను మోహించి విడక - నీకుఁ బట్టమహిషి యయ్యె నిశ్చయముగ భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	78
సీ.	హరిదాసులను నిందలాడకుండినఁ జాలు - సకలగ్రంథంబులు చదివినట్లు భిక్ష మియ్యంగఁ దప్పింపకుండినఁ జాలుఁ - జేముట్టి దానంబు చేసినట్లు మించి సజ్జనుల వంచించకుండినఁ జాలు - నింపుగా బహుమానమిచ్చినట్లు దేవాగ్రహారముల్‌ దీయకుండినఁ జాలు - గనకకంబపు గుళ్లుగట్టినట్లు
తే.	ఒకరి వర్షాశనము ముంచకున్నఁ జాలుఁ - బేరుకీర్తిగ సత్రముల్‌ పెట్టినట్లు భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	79
సీ.	ఇహలోకసౌఖ్యము లిచ్చగించెద మన్న - దేహ మెప్పటికిఁ దా స్థిరత నొంద దాయుష్యమున్న పర్యంతంబు పటుతయు - నొక్కతీరున నుండ దుర్విలోన బాల్య యువత్వ దుర్బల వార్ధకము లను - మూఁటిలో మునిఁగెడి ముఱికికొంప భ్రాంతితో దీనిఁ గాపాడుద మనుకొన్నఁ - గాల మృత్యువు చేతఁ గోలుపోవు
తే.	నమ్మరాదయ్య! యిది మాయనాటకంబు - జన్మమిఁక నొల్ల నన్నేలు జలజనాభ! భూషణవికాస! శ్రీధర్మపురనివాస! - దుష్టసంహార! నరసింహ దురితదూర!	80