ఉ.	కన్నులు చాల పెద్దయవి; కన్బొమలుం గడుఁదీర్చి దిద్దిన ట్లున్నవి; సోగయై తనరుచున్నది నాసికయున్‌, లలాట మ త్యున్యతమై యెసంగుఁ; గురు లొత్తనియే యనవచ్చు; జాలు నీ వన్నెయు నన్నిటం దగినవాఁడె లభించెను నేఁటి కక్కకున్‌.

సీ.

మానాభిమానముల్‌ - మాపుకో వలయును     విసుగును గోపంబు - విడువ వలెను సమయంబుఁ గనిపెట్ట - సంధింప వలయును     త్రిప్పిన ట్లెల్లను - దిరుగ వలెను నీవె దేవుఁడ వని - సేవింప వలయును     ఇచ్చకంబుల మురి-యింప వలెను బ్రోకరు రుసుమును - బొడిగింప వలయును     దరి గుమాస్తాగానిఁ - దనుప వలెను నాల్గురె ట్లేని యాస్తిక-న్పఱుప వలెను వడ్డి యెం తన్నఁ దలయొగ్గ - వలెను; షరతు లేమి కోరిన శిరసా వ-హింప వలెను పుట్టునెడ నప్పటికిఁ గాని - పుట్ట దప్పు.

సీ.

కూలి నాలియు లేక - కుడువ తోవయు లేక     మలమల పస్తులు - మాడువారు ఇల్లు వాకిలి లేక - యిల్లాలు లేక, యే     చెట్టు నీడనొ నివ-సించువారు పయిని పాతయు లేక, - పండఁ జాపయు లేక     వడవడఁ జలిలోన - వడకుఁవారు కాళ్ళుఁ గన్నులు లేక, - కదల మెదల లేక     దేవుఁడా! యనుచు వా-పోవువారు కలరు మనదేశమునఁ గోట్ల - కొలఁది నేఁడు వారినెల్లర నెపుడుఁ గ-న్నాఱఁ గనుచు పందలంబోలె మన మికఁ - బ్రతుకు టెట్టు లనుచుఁ జింతింప వచ్చునే - యజ్ఞురాల!

సీ.

ఱాతిలోఁ గప్పను - రక్షింపఁగల తండ్రి     బొరియలోఁ జీమను - బ్రోచు తండ్రి గంగలోఁ జేఁపను - గాపాడఁగల తండ్రి     మంటిలో నెఱ్ఱను - మనుచు తండ్రి పుట్టలోఁ జెదలను - బోషింపఁగల తండ్రి     కలుగులో నెలుకను - గాంచు తండ్రి నాభిలోఁ గ్రిముల క-న్నము పెట్టఁగల తండ్రి     పేడలోఁ బురుగును - బెంచు తండ్రి భూజములకెల్ల నీరము - పోయు తండ్రి శిశువుతో స్తన్యముం దయ - సేయు తండ్రి దయయె స్వస్వరూపంబుగాఁ - దనరు తండ్రి మనలఁ బోషింపఁడే వెఱ్ఱి-మాట గాక!