గీ.	ఆస్తి కలిగి తీఱుప లేని - యప్పె యప్పు, నూఱు గొని వేయికై వ్రాయు - నోటె నోటు, పసిడి తాకట్టుపైనిచ్చు - బదులె బదులు, రోజువడ్డీలు వచ్చిన - రోజె రోజు.

సీ.

ప్రాయఁ ముడిగి, యేండ్లు - పైఁ బడ్డ తరి, భ్రాంతిఁ     జెంది రెండవపెండ్లి - చేసికొనుట ఆస్తి దాయాదుల - కగు ననుచింతచేఁ     బెరవారి బిడ్డను - బెంచుకొనుట క్రొత్తలోఁ జూపు మ-క్కువ లెల్ల మది నమ్మి     అత్తవారింటను - హత్తుకొనుట అప్పులవారిని - దప్పించుకొన సొత్తు     లితరులపేర వ్రా-యించి యిడుట పుడమి, నీ నాలుగుఁ జాల - బుద్ధిమాలి నట్టి పను లని పల్కుదు - రార్యులెల్ల రందు, మూడవ పెండిలి - యాడినట్టి బడుగునగు నన్నుఁ గూఱిచి - పలుకనేల?

(చదువును)

"మాపురమునందలి పుణ్యమూర్తుల పురుషోత్తమరావు పంతులుగారి కుమార్తెను లుబ్ధాగ్రేసర చక్రవర్తి యగు సింగరాజు లింగరాజుగారు తనకుమారునకుఁ జేసుకొనుటకై, అయిదువేల అయిదువందల రూపాయల కట్నము విధించి, యాసొమ్ము, కార్యమునకు ముందే కాఁజేసిరి! కట్నపుఁ బెండ్లియెడ నిష్టము లేక కాళింది యను నాచిన్నది తల్లిదండ్రుల కొక యుత్తరమువ్రాసి తన బల్లపైనుంచి బావిలోపడి ప్రాణములు విడిచెను! ఆ యుత్తరమునం దున్నమాట లివి-

'నా ప్రియమైన తల్లిదండ్రులారా! నమస్కారములు! కట్నమిచ్చి తెచ్చిన వరునిచేఁ, గళ్యాణసూత్రము కట్టించుకొనుట గౌరవహీనమనియు - నా వివాహమునకై మీరు సర్వస్వము సమర్పించుట నా క్షేమమునకును, మీ సౌఖ్యమునకును గూడ భంగకరమనియు భావించి - ఈ రెంటియొక్కయు నివారణమునకై నేనీ లోకమును విడిచిపోవ నిశ్చయించుకొని యీ జాబువ్రాసి యిచ్చటినుంచి యనుజ్ఞ తీసికొనుచున్నాను. అమ్మకాని, మీరుకాని, నాకై అణుమాత్రమును జింతింప వలదని ప్రార్థించుచున్నాను. మీ యిరువురుకును బునః ప్రణామములు. చెల్లెలికి ముద్దులు!

ఇట్లు విన్నవించు మీ యనుంగు పుత్త్రిక - కాళింది'

ఒక పౌరుఁడు"