ఆంధ్రభారతి - శతకములు - కుప్పుసామి శతకము - కవిరాజు త్రిపురనేని రామస్వామి

కూలినాలి చేసికొనుచు జీవించువాఁ డేని నీతిశాలి యెందుఁ బూజ నీయుఁ డతని నెపుడు నెఱనమ్మగా వచ్చుఁ గొఱఁతరాదు దానఁ గుప్పుసామి.	41
బ్రతికి చెడ్డవాని వలని నేస్తముఁజేయు చెడి బ్రదికినవాని చెలిమి వలదు వీనియందు నేది విపరీతమైనను ముప్పు తప్పఁబోదు కుప్పుసామి.	42
ఒక్క కొడుకెయైన నూరక చెడిపోవు మకురు తనము చేత మాటలేల? పెద్దయైన కొలఁది పెద్దగాఁ జింతించుఁ గొడుకు కొఱకుఁ దండ్రి కుప్పుసామి.	43
ప్రతిభ గల్గువాఁడు పతనంబుఁ జెందిన మరల పైకివచ్చు మహిత శక్తి రాలి పడిన పూలు రమణులు క్రొవ్వెద నొప్పుఁ జూపరావె? కుప్పుసామి.	44
చేతగామిఁ బనులు చెడిపోయి నంతనే విధిని దూరుచుంద్రు వెఱ్ఱివారు విధికి దీననేమి పెత్తనంబుండునో! తప్పుమాటగాక కుప్పుసామి.	45
ముండులున్న నేమి మురువు గొల్పు గులాబి గొప్పవారుకూడఁ గొనుచునుంద్రు కొద్దిదోషమున్న గుణవంతుఁ బూజింత్రు తప్పకుండ జనులు కుప్పుసామి.	46
సాన నరగఁదీయు కొలంది చందనంబు కలయఁ జిమ్ముచు నుండును గమ్మతావి సజ్జనుం డిట్టులనె కష్ట సమయమందు నొప్పుఁ గాంచుచు నుండును గుప్పుసామి.	47
వారకాంతలఁ బడఁదిట్టు వారుగలరు విటులు క్రవ్వింపకుండిన వేశ్యలెట్లు చెఱచువారలో పురుషులఁ జెప్పఁబోరు కుచ్చితులుగారె వీరెల్లఁ గుప్పుసామి.	48
విత్త మన్యాయముగఁ గూడఁబెట్టి భయము చేత దానధర్మంబులఁ జేయుటేల అడుసు ద్రొక్కఁగానేల? కాల్గడుగనేల? యెప్పుడైన లాభముకద్దె? కుప్పుసామి.	49
పురుషుఁ డెన్ని రోగములచేతఁ బీడింపఁ బడుచునున్న సతికి వరవుడంబు సల్ప ధర్మమంట జగతిలో నిదియెటో చెప్పఁబోరు జనులు కుప్పుసామి.	50