ఆంధ్రభారతి - గీతగోవిందం - జయదేవ - అష్టపది - అష్టపదులు

అష్టమః సర్గః - విలక్ష్య లక్ష్మీపతిః
అథ కథమపి యామినీం వినీయ స్మర శర జర్జరితాఽపి సా ప్రభాతే । అనునయ వచనం వదంత మగ్రే ప్రణతమపి ప్రియమాహ సాభ్యసూయమ్‌ ॥	1

॥ ప్రబంధః - 17 ॥ (లక్ష్మీపతి రత్నావళీ) (భైరవి - ఆది) భైరవీ రాగ యతి తాళాభ్యాం గీయతే ।
రజని జనిత గురు జాగర రాగ కషాయిత మలస నివేశం । వహతి నయనమనురాగమివ స్ఫుటముదిత రసాభినివేశమ్‌ ॥
(హరిహరి) యాహి మాధవ! యాహి కేశవ! మా వద కైతవ వాదం । తా మనుసర సరసీరుహలోచన! యా తవ హరతి విషాదమ్‌ ॥ (ధ్రువమ్‌) ॥
కజ్జల మలిన విలోచన చుంబన విరచిత నీలిమ రూపం । దశన వసనమరుణం తవ కృష్ణ! తనోతి తనోరనురూపమ్‌ ॥
వపురనుహరతి తవ స్మర సంగర ఖర నఖర క్షత రేఖం । మరకత శకల కలిత కల ధౌత లిపేరివ రతి జయ లేఖమ్‌ ॥
చరణ కమల గళదలక్త సిక్తమిదం తవ హృదయముదారం । దర్శయతీవ బహిర్మదనద్రుమ నవ కిసలయ పరివారమ్‌ ॥
దశన పదం భవదధర గతం మమ జనయతి చేతసి ఖేదం । కథయతి కథమధునాఽపి మయా సహ తవ వపురే తదభేదమ్‌ ॥
బహిరివ మలినతరం తవ కృష్ణ! మనోఽపి భవిష్యతి నూనం । కథమథ వంచయసే జనమనుగత మసమశర జ్వర దూనమ్‌ ॥
భ్రమతి భవానబలా కబళాయ వనేషు కిమత్ర విచిత్రం । ప్రథయతి పూతనికైవ వధూ వధ నిర్దయ బాల చరిత్రమ్‌ ॥
శ్రీ జయదేవ భణిత రతి వంచిత ఖండిత యువతి విలాపం । శృణుత సుధా మధురం విబుధా విబుధాలయతోఽపి దురాపమ్‌ ॥

తవేదం పశ్యంత్యాః ప్రసరదనురాగం బహిరివ ప్రియా పాదాలక్త చ్ఛురిత మరుణద్యోతి హృదయం । మమాద్య ప్రఖ్యాత ప్రణయ భర భంగేన కితవ త్వదాలోకః శోకాదపి కిమపి లజ్జాం జనయతి ॥	2
అంతర్మోహన మౌళి ఘూర్ణన చలన్మందార విభ్రంశన స్తంభాకర్షణ దృప్తి హర్షణ మహా మంత్రః కురంగీ దృశాం । దృప్యద్దానవ దూయమాన దివిషద్దుర్వార దుఃఖాపదాం భ్రంశః కంస రిపోర్వ్యపోహయతు వః శ్రేయాంసి వంశీ రవః ॥	3

ఇతి శ్రీజయదేవకృతౌ గీతగోవిందే విలక్ష్య లక్ష్మీపతిర్నామ అష్టమస్సర్గః॥