వందే విష్ణుం విష్ణు మశేషస్థితిహేతుం
త్వా మధ్యాత్మజ్ఞానిభి రంతర్హృదిభావ్యం
హేయాహేయద్వంద్వవిహీనం పరమేకం
సత్తామాత్రం సర్వహృదిస్థం దృశిరూపం ॥వందే॥

ప్రాణాపానౌ నిశ్చయబుధ్యా హృదికృత్వా
ఛిత్వా సర్వం సంశయబంధం విషయౌఘాన్‌
పశ్యంతీశం యం గతమోహాయతయస్తం
వందే రామం రత్నకిరీటం రవిభాసం ॥వందే॥

మాయాతీతం మాధవ మాద్యం జగదాదిం
మానాతీతం మోహవినాశం మునివంద్యం
యోగిధ్యేయం యోగవిధానం పరిపూర్ణం
వందే రామం రంజితలోకం రమణీయం ॥వందే॥

భావాభావ ప్రత్యయహీనం భవముఖ్యై-
ర్భోగాసక్తై రర్చితపాదాంబుజయుగ్మం
నిత్యం శుద్ధం బుద్ధమనంతం ప్రణవాఖ్యం
వందే రామం వీర మశేషాసురదావం ॥వందే॥

త్వం మే నాథః సాదితకార్యోఽఖిలకారీ
మాయాతీతో మాధవరూపోఽఖిలధారీ
భక్త్యాగమ్యో భావితరూపో భవహారీ
యోగాభ్యాసైర్భావితచేతః సహచారీ ॥వందే॥

త్వా మాద్యంతం లోకతతీనాం పరమీశం
లోకానాం నో లౌకికమానై రభిగమ్యం
భక్తిశ్రద్ధాభావితచిత్తైర్భజనీయం
వందే రామం సుందర మిందీవరనీలం ॥వందే॥

కో వా జ్ఞాతుం త్వా మతిమానం గతమానం
మానాసక్తో మాధవశక్తో మునిమాన్యం
బృందారణ్యే వందితబృందారక బృందం
వందే రామం భవముఖవంద్యం సుఖకందం ॥వందే॥

నానాశాస్త్రై ర్వేదపురాణైః ప్రతిపాద్యం
నిత్యానందం నిర్విషయం జ్ఞానమనాదిం
మత్సేవార్థం మానుషభావం ప్రతిపన్నం
వందే రామం మరకతవర్ణం మధురేశం ॥వందే॥

శ్రద్ధాయుక్తో యః పఠతీమం స్తవమాద్యం
బ్రాహ్మం బ్రహ్మజ్ఞాననిదానం భువిమర్త్యః
రామం శ్యామం కామితకామప్రద మీశం
ధ్యాత్వా ధ్యాత్వా పాతకజాలై ర్విగతః స్యాత్‌ ॥వందే॥