నే ధన్యనైతినే జగత్ప్రభో సాధులోకవిభో ॥నే॥

మాధవ చరణారవింద మకరందము గ్రోలఁ గల్గె ॥నే॥

మునుమిడి సంశయమనే ముడి వీడె నీయనుగ్రహ-
మున రామతత్త్వము సంక్షేపముగ వింటి కడతేర గంటి
మనసు తనివి దీరదాయె మన్నింపవే దైవరాయ
అనువొంద నిను జేర మాయ యతిదూరమై తొలఁగిపోయె ॥నే॥

అద్వితీయాఖండ పరిపూర్ణానంద వారిధిలోన
చిద్విలాసోల్లాసినై రంజిల్లఁ జేసి నన్ను డాసి
హృద్వికాస మొనరించి హితవాక్యము లుపదేశించుటచే
విద్వన్నుత శంకర విశ్వేశ శంభో మహాదేవ ॥నే॥

స్వామీ నే నీచే విన్న యీ చరితము నవరసభరితము
వేమాఱు దీని వినఁ బల్కు వీను లమృతము జిల్కు
శ్రీమహిళాభిరాముఁడై శేషాద్రిధాముఁడైన శ్రీ-
రాముని దేవతాసార్వభౌముని నీవలన దెలిసి ॥నే॥